രണ്ട് പല്ലികൾ

സ്വയം വാൽ മുറിച്ച വെളുത്ത പല്ലി

തന്റെ വീരകൃത്യം ഉറക്കെ പ്രഖ്യാപിച്ചു.

അകലെ നിന്ന കറുത്ത പല്ലിയോട്

അവൻ വിളിച്ചു പറഞ്ഞു-

"മുറിച്ചു മാറ്റൂ നീയും"

കറുത്ത പല്ലി തിരിച്ച് പറഞ്ഞു

"നിന്റെ വാൽ നിനക്ക് 

അലങ്കാരവും അശ്ലീലവുമാണ്.

എനിക്കതൊരു വൃത്തികേടും, ബാദ്ധ്യതയും.

ഞാൻ മുറിച്ചാലും നിങ്ങളെനിക്കത്

വീണ്ടും വച്ച് പിടിപ്പിച്ച് തരും.

എനിക്കതുണ്ടാവേണ്ടത്

നിങ്ങളുടെ ആവശ്യമാണ്.

നിന്റെ വാൽ മനോഹരമെന്ന്

ഓർമ്മപ്പെടുത്താൻ.

എനിക്കത് മുറിക്കാനാവില്ല സുഹൃത്തേ

നിനക്കതാവാം പക്ഷേ,

അതിങ്ങനെ വിളിച്ച് കൂവണമെന്നില്ല."